يِسعِد مَسَا لِ نوَّرو لبنان
ويِسعِد مَسَا لْ بِقلوبنا حَلّو
عيد المَحَبِّة بْجَمعِة العِربان
رَشّو عَلينا الوَرد عا حِلّو
يِسعِد مَسَا كل مُطرِب وفَنّان
وشاعر عا قَلب الناس مِحتَلّو
يِسعِد مَسَا لِ خاطَبوا الألوان
ويلي حَجَر ضِجران ما خلّو
كلن سوا بيمَجدوا الرَحمن
الإبداع طاغي عالطَقِم كِلّو
ويِسعِد مَسَا هالمُنتَدى المَليان
مْحَبِّة وثَقافِة وجوهَر الألفة
بْفَضلَك عِماد بتِحتِفي الأوطان
بيرَق ثقافة للسَما عِليان
وشِعلِة مَجد لِبنان ما بْتُطفي
أهل العراق لْ عطروا الجَمعة
وعم يدعموا القامات مِجتِمعة
جعفر مَحَبِّة وقلب إنساني
إيد الكَرَم والجود مِليانِة
لولا شَكَرتَك ما بِقي أبيات
وْلا سَكتِت الزَقفات عا جُمعَة
———————-
سْلاحو الحجر شو بيعمل بأشرار
ومِحتل عم يخنق هنا عيشو
لما الكرامة بتنده الأحرار
بتقشع طفل واقف عا خط النار
تا يوقِّف المحتل مع جيشو
هاك الطُفُل من دون حَكي قَلّي
خَبَّر الي حكايات عن ذاتو
مَطرَح ما رب الكون بيصَلّي
رح ترتفع للمَجِد راياتو
قلي أنا فْلِسطين بِعروقي
بحارب بِلحمي الحي لو فيني
بْغَنّي لِها مواويل وِشروقي
نْ رجعت لحضن الشَعب فْلِسطيني
يلي سَلَبها حْقوقها مِختل
وعم يِرهُب الأجيال بالمَدفَع
مِش رَح نْفَتِّش عا أرض وِنفِل
نِحنا شَعِب بيموت ما بيركع
يا مسجد الأقصى العَرَب جايين
نِشبُك إيدينا ونِضحَك سْوية
ونِسجُد لَ الله بْساحِة فْلِسطين
وتِسطَع عا أرضِك شَمس حُرِّية
———————-
ضَلّي ضْحَكي ما الضِحِك غِنّية
سْمِعتا أنا لكن بعينيي
قَلبِك ضِحِك نَزَّل معو غيمة
ولما بِكي خلّا الدني خَيمِة
بْقلبا أنا وِمقَفَّل عْليي
شاعر لبناني
