عبّر الفنان حسن شاكوش، عن استيائه من تدن مستوى المحتوى المقدم على التيك توك، ومواقع التواصل الاجتماعي.
حسن شاكوش: بقينا بنشوف هبل وعبط على التيك توك
وقال حسن شاكوش، من خلال ڤيديو عبر حسابه الشخصي على “الفيسبوك”: “ الواحد بقى بيشوف حاجات غريبة على التيك توك والموضوع بقى مقرف جدًا الصراحة، حتى التيك توك اللي كنا بنحب نتفرج عليه علشان يهون علينا ونشوف حاجات تضحكنا”.
وأضاف حسـن شاكوش: “بقينا نشوف عليه عبط وهبل والعيال اللي بتعمل تحديثات و لايفات .. اللي بيحمي نفسه بالشطة واللي تبهدل نفسها.. إيه الهبل اللي أنتوا فيه ده؟! .. فيه ناس كتير محترمة وفيه ناس كانت بتستفاد منه وأنا شخصيًا كنت بستفاد منه، إنما القرف اللي الواحد بيشوفه ده مش ممكن، اعمل حاجة تفيدك ولو محتاج فلوس اعمل حاجة تفيد الناس علشان لما عيالك يكبروا يشوفوا إنك بتقدم محتوى كويس وهادف”.
كما أضاف: “ابنك لما يكبر هيلاقي أنك شاب هايف أو ست تافهة، هيبقوا زيكم، هل تقدر وأنت هايف تقول لابنك ما تعملش كده؟! .. الفلوس مش كل حاجة ده قرف .. وأول مرة أطلع أتكلم على حاجة لكني بقيت أكره أفتح التيك توك بسب الأشكال اللي الواحد بيشوفها فعلاً”.
