لو ابنك شرب كلور أو فنيك أو بوتاس أو ورنيش أو بويا أو جاز أو صودا كاوية أو كحول أو أى مادة كاوية…. تعمل ايه بسرعة لحد ما تروح لأقرب مركز لعلاج السموم ؟؟ .
أولاً : ممنوع تماماً تخلى الطفل يرجع غصب عنه .. يعني ممنوع تشربه مياه بملح أو لبن ببيض أو تدوس على لسانه علشان يرجع أو تعمل له غسيل معدة . ليه ؟؟
علشان انت كده بتعرض المريء والبلعوم والفم للمادة الكاوية دي تاني يعنى بتضره أكتر ( زي اللي جه يكحلها عماها ) . وكمان ممكن تدخل الماده الكاوية دى فى الجهاز التنفسى و ده ممكن يسبب إلتهاب رئوى شديد.. لا قدر الله .
ثانياً : شربه فنجان لبن وبس بدون مياه
طيب ليه لبن مينفعش مياه مينفعش مياه علشان المواد الكاوية دى ممكن تكون حمض “acid” أو قلوى “alkaline” .. وممكن تتفاعل مع المياه داخل المعدة وينتج عن التفاعل ده مواد تزود المشكلة..
وتدمر أنسجة المعدة أكثر وأكثر ،يعنى برضه( زى اللى جه يكحلها عماها )وهما شوية اللبن الصغيرين دول هيعملوا ايه بقى؟؟
هيخففوا شوية من تركيز المادة إلى شربها .. ولو فيه حاجة واقفة فى فمه او البلعوم او المرئ هيحركوها للمعدة…
طيب ليه شوية صغيرين مش نصف كيلو لبن مثلاً؟
علشان ما يحصلش قئ ..وقلنا قبل كده ان إحداث قئ فى مثل هذه الحالات خطيررررر جدااااا….
ثالثاً : هو ينفع نعادل المادة اللى شربها الطفل يعنى لو هو شارب حمض أديله قلوى أو العكس علشان أقلل مفعولها
طبعا غلط لان هينتج عن ده تفاعل كيميائي وده هيسبب تدمير للأنسجة…
يعنى جه يكحلها……ايوة بالظبط كده….
رابعاً : نقل الطفل للهواء النقى علشان يقدر يتنفس ..
خامساً : لو المادة الكاوية وقعت على هدومة يقلعها ونغسل جسمه كويس ..
سادساً : لو المادة دى وقعت على عينة نغسلها كويس جداً بالمياه لمدة ربع ساعة …..
وبسرعة نجرى لأقرب مركز سموم لسرعة اتخاذ الاجراءات الطبيه الازمة للطفل حسب حالته وحسب مدى سمية المادة وحسب الكميه اللى اخذها وحسب المدة اللى اتأخر فيها…..
وطبعاً لازم تاخد معاك زجاجة المادة التى شرب منها الطفل….للتعرف على المادة وتحديد كيفية العلاج
وياما شفنا حالات كانت ممكن تتلحق بتطبيق المعلومات دى
د/مريم ميلاد
