دكتورة مريم ميلاد تكتب.. رحلة أول 1000 يوم فى حياة الطفل ، رحلة سعيدة

▪︎ أول ساعة بعد الولادة:

خدى طفلك فى حضنك لأن ملامسة جلدك لجلده له فوايد كتير أهمها إنه بيدفى ، و يحس بالأمان ، و كمان الحضن ده بينظم ضربات قلبه و معدل تنفسه

▪︎ الرضاعة الطبيعية من أول ساعة بعد الولادة و ضرورى طفلك ياخد لبن السرسوب اللى بينزل أول ٣ أيام لأنه بيحسن مناعة الطفل ضد الأمراض المختلفة مدى الحياة 

▪︎ الرضاعة الطبيعية المطلقة أول ٦ شهور من حياة الطفل و الرضاعة بتكون حسب الحاجة يعنى كل ما طفلك يجوع رضعيه مهم جدا تفضى صدرك علشان اللبن يتفرز بإستمرار 

▪︎ الرضاعة الطبيعية لمدة سنتين بتقوى العلاقة بينك و بين طفلك و بتزود مناعته و نسبة الذكاء عنده

▪︎ ضرورى تتعلمى وضع الرضاعة الصح بحيث تكونى قاعدة و ذراعك مرفوع بزاوية ٤٥ درجة و الطفل يكون جسمه مستوى و بطنه على بطنك

▪︎ الطفل أول ٤ شهور مش محتاج يشرب مياه علشان ميشرقش منك و متقلقيش اللبن فيه كمية مياه كافية جداً 

▪︎ طبيعى إن الطفل بيخس شوية أول أسبوع من عمره و بيرجع يزيد تانى بعد الأسبوع الأول بمعدل ربع كيلو كل عشر أيام 

▪︎ تعرفى إن لبن صدرك مكفيه و مش محتاج أى مساعدة بلبن صناعى لما تلاقى وزنه بيزيد و لما تلاقيه بيعمل حمام بول و براز بمعدل ٢_٥ مرات يومياً 

▪︎ إحرصى على إعطاء الطفل التطعيمات الإحبارية فى مواعيدها و لو هتدى التطعيمات الإضافية يبقى كويس جداً

▪︎ ضرورى تقللى الشاى و القهوة وقت الرضاعة و احرصى على تناول المشروبات المفيدة و أهمها اللبن و العصائر الفريش و المشروبات الدافئة

▪︎ بعد إنتهاء السنة التانية تبدأى تفطمى طفلك بالتدريج علشان ميتأثرش نفسياً و أكليه من كل الأكل الصحى البيتى 

▪︎فى السنة التالتة تابعى كلامه و مخرج الألفاظ بتاعته و عوديه على البوتى و تابعى ذكائه و ووزنه

▪︎ ممنوع الطفل يمسك القلم و تجبريه على الكتابة قبل سن ٣ سنوات لأن عضلات و عظام إيديه مش بتكون لسه مؤهلة بالشكل الكافى 

د/مريم ميلاد

أخصائية طب الأطفال وحديثى الولادة واستشارى التغذية العلاجية للأطفال جامعة ادمور الأمريكية