دكتور خيري السلكاوي يكتب.. يالا روح لها (عامية)

 

لما النهار ..

يدَّارى في عيون الشقا

و الليل يكبل خطوتك ..

وسط الزحام

..

اعرف بإن اللي بيقرب ..

لأغصانك لقا 

و العش راح يرجع ..

يعيش فيه الحمام 

..

اصل الطيور ..

مهما الغصون مالت بها 

هاتلاقي مأوى غيرها فين ..

حب و سلام

..

مين اللي فينا ..

جه عليه الدور 

انا و انت و احنا كلنا ..

نفس الشعور  

الدمعة لو ضاقت ..

بشكوتها العيون

تروي على خدود الألم ..

ضلمة بنور

تغسل تقاسيم الوجع ..

جوا الصدور

تزرع أمل تحصد زهور 

..

فمترتميش ..

في حضن اسراب الغراب 

و تقول نصيبي وقسمتي ..

هجر وعذاب 

لو باب لقيته بينقفل …

قدام عنيك 

دور تلاقي بينفتحلك ..

الف باب

..

خليك ندى ف الصبح ..

للأرض الشراقي

تطرح وشوش الورد منها ..

حب راقي

متعتقة فيه العطور ..

ولا اي نظرة منه بور

اييه اللي باقي ..

بنظرة واحدة منه تعبر ..

أي سور 

..

و تعيش ملك …

من غير غرور بين النسور

تنسج لنسرايتك بروحك…

بيت ملوكي 

..

تكتبلها …

و تفك شفرة سهمها ..

بالعقل مش بالمنجهة ..

بين السطور و تقول لها

قلبي و عيني عمرهم ..

ما ف يوم نسوكي

..

و تطير بها ف توناية ..

الحب السوزوكي ..

تبقى ف عنيكم ..

جيب شروكي

..

ملكة على جناح الأمل

ايه العمل ..!

أفرد جناحاتك…

و يلا روح لها

وب بصة حلوة ف وشها

و بطبيعة على خدها

تلقاها فاتحة حضنها

..

ماهي النسور كدة حبها

دايما بتبقى …

ناره قايدة ف قلبها

..

العشق إيه ..؟

غير نسر بيدوب في الحبيبة   

ينسى انه بين كل الطيور ..

له الف هيبة

لكن حبيبته دي انخلق ..

من اجلها

حاجة غريبة ..!

م الضلع الاعوج تتخلق ..

أجمل حبيبة ..!

ربك اراد وحكمته ..

فينا عجيبة

سبحانك اللهم عفوك .. نرتجي ..

بشرى قريبة ..!

..

افرد جناحاتك …

و يلا روح لها

و قوووول لها ….

..

مش بردو لينا ف الغرام..

اجمل حكاية 

من يوم ما حط الصقر ..

فوق رايتك و طار بيكي ف سمايا

و قريت كتاب الله لقيتك ..

جوا منه احلى اية 

حسيت بإن الكون بحاله…

كان معايا

يوم ماتنصب في دنشواي ..

ظلم احتلالهم مشنقة

واستفردوا …

بعرابي ف التل الكبير

مابين اذى السندان ..

وخبث المطرقة 

ناسيين بأن الصقر لما بيتزنق ..

بيطير لفوق 

مهما اتنصب ..

حوالينه طوق .

تفضل عيون مبحلقة ..

و يعود يرفرف من جديد

لجلن تعود كل الحقوق

لجلن تعود كل الحقوق

..

أفرد جناحاتك ..

و يلا روح لها

مين قدها 

الصقر قلبه انشد ليها و شدها

..

هاتلاقي فين …

ف الحسن واحدة زيها ..

مشيتها ع الكورنيش ..

جمالها اوبها

و نهر خير م بينتهيش ..

ما بين اديها و صدرها

تشرب و تسقي اهلها

كل اللي عدوا من هنا ..

وقعوا ف غرام اجمل مها

لكن انت بس اللي قدرت ..

يا مصري تدفع مهرها

..

أفرد جناحاتك ..

و يلا روح لها

و اكتب على جدار الزمن .. 

” مصر الأبية حبها ..

مالهوش تمن

غير روحي لو تحتاج لها

افديها بيها ف المحن ..

و ابصم لها ..

بالعشرة اني بحبها ..

و ابصم لها ..

بالعشرة اني بحبها 

..

بحبها بحبها بحبها

بحبها بحبها بحبها