دكتور سمير المصري يكتب....(في حب اولاد الأصول ... اتعلم واتكلم)

لما نتكلم شوية عن ولاد الأصول اللي ما بقيناش بنقابلهم في حياتنا كتير .. لازم نقف كتير … طيب أنت بتعرف ابن الأصول ازاي ؟؟

مش ممكن عمره ينكر فضل حد عليه …بعد فضل ربنا عليه أو ينساه ..
دايما بيفضل باقي على العشرة لحد آخر لحظة، وطول عمره بيعمل كل اللي عليه وزيادة ..

عمره ما بيرد الأذي بالأذي .. وأكيد وقت الشدة لو  إحتاجته لازم هتلاقيه، جرب كدة من غير ما تطلب … كمان هتلاقيه قدامك ..
دايما بيساعد الكل من غير أي مصلحة تعود عليه .. هو كدة دي طبيعته ونسله الطيب …

إبن الأصول دايما كرامته عنده أهم حاجة، رقم واحد في حياته، ومستحيل هيقبل أي إهانة مهما كان اللي بيوجها إليه … هي دي طبيعته، ده إسلوبه في حياته… دايما تلاقي نفسه عزيزة عليه فوق ما خيالك ممكن يوديك .. أو حتي تتوقع…

النوع ده بيعرف يعتذر .. لو كان غلطان عمره ماكان بيستكبر .. ممكن في لحظات يقول أنا آسف، أنا غلطت فعلاً، وغلطتي مش هكررها …. ما بيكررش غلطته …

كلمته واحدة فعلا لما يقولك هعمل يبقي هيعمل …فعلا صدقه .. دايما ضميره من جواه بيتحكم فيه، بيأثر فيه، مش بيسلم ودانه لحد مش بيسمع لإنسان .. وصاحب صاحبه جدا .. كمان مستحيل يبيع صاحبه علشان مصلحته ..

علي فكره هو حد جدع بالفطرة.. الطيبة في حياته وأفعاله .. مش كل شوية يقول أي ملام … او كلام ..ملوش في اللت والعجن وكتر الكلام وشغل ملوش لازمة

والشئ الغريب إنه بيعرف يعاتب مرة، وإتنين …. وثلاثة
علشان هو ده طبعه فعلاً … يعني مش من طبعه إنه يفرط في حد بسهولة .. بس مشكلته الازلية انه لما بيفرط ربنا ما يوريك عمرك ما هتعرف ترده مرة تانية أو ترجعه تاني .. علشان كدة عمره ما يتكلم عنك بعد مابيبعد عنك …. ويسيبك ويمشي..

الخلاصة

شخص ملوش في الحوارات ، يعني بيقولك في وشك اللي هو عايزه.. وأيه اللي ممكن ينفع وإيه اللي مينفعش .. اللف والدوران مش سكته ..

شخص عزيز وله بدل العزيز عزيز وإتنين .. مش زي غيره مالوش غالي .. يعني لو إتظلم عمره ما يظلم .. دايما كدة بيسيب ربنا يجيبله حقه ..
دايما يصفي بسرعه لو لقاك شاري .. وينسي بسرعة لو لقاك بايع ..
هي دي طبيعته … يحب الخير لغيره حتي لو مش هيطول من الخير دة حاجة .. ودايما يفرحلك من قلبه بجد ..
هو كدة عينه شبعانه، عارف عمره ما يبص في رزق غيره
ولا يبص في حياة غيره ..

بيقدر ويحترم أبسط وأقل حاجة حلوة بتعملها معاه .. مبيعرفش يخون ولا يغدر ، ولا يجرح ، ولا يستغل فرص ولا يستغل حد ..
بإختصار …… ابن الأصول صاحب الكل ..
#دسميرالمصري