دكتور مينا عزت يكتب.. سِر الخلطة فى نجاح التعامل مع الأسئلة المحرجة من الشخصيات المؤذية

كتير مننا بيقع فى مشكلة الاحراج وضياع حقوقه وايذاء الآخرين له ،ولا يستطيع الرد إيماناً منه أن ده الأصول انى ماأحرجش حد أو مش بحب أزعل حد أو يابخت من بات مظلوم وماباتش ظالم ،كل العبارات دى بتدينا روح انهزامية واستسلام لكل من يؤذينا وكل مابنسكت بيعتبر أن ده قبول وموافقة ضمنية للإهانة والتجريح ومع تكرار ذلك يزداد الشعور بالعجز وعدم المقدرة ويصحبه شعور بتأنيب الضمير وجلد الذات بسبب الاستسلام لأشخاص لايقدرون أدبه وأخلاقه واحترامه بل يستهينوا بشخصيته ويسقطوا مابداخلهم من مكبوتات عليه وتصبح عادة لديهم إهانته 

وبصراحة علشان ماتتفاجئش لازم تفهم انك بتعيش وسط أناس معظمهم غير أسوياء ،فلابد من بناء حائط صد لنفسك ضد إيذاء الآخرين ليك ويكون عندك المناعة النفسية القوية اللى تبنيك قبل مايهدمك الآخرين بعباراتهم المسمومة ،اللى بتقعد زعلان بسببها وتعطل حياتك وتعوق نجاحك ،والآخرين مش حاسين بيك ومش معبرينك لأنهم ببساطة مش مدركين مدى الأذى اللى وصلتله بسببهم 

فبعد اذنك علشانك وعلشان تحافظ على مناعتك النفسية نفذ سِر خلطة التبجح مع من اعتاد ايذاءك 

من خلال استخدم اسلوب البينج بونج فى الرد على الأسئلة المحرجة 

🤏🤏أمثلة للأسئلة المحرجة وإجاباتها الدبلوماسية النموذجية ،🤔🤔🤔

❌سؤال / انت مالك كده مكتئب كده ليه ؟

✔️جواب /انا الحمد لله كويس ولو شايف أن انا مكتئب فدى وجهة نظرك احتفظ بيها لنفسك 

،❌سؤال / مرتبك كام ؟

✔️جواب /أقل من مرتبك بشوية 

❌سؤال /ابنك طالع شكله وحش لمين ؟

✔️جواب /الحمد لله خلقة ربنا 

،❌سؤال /انتى مالك كده فيه سواد تحت عنيكى ووشك دبلان؟

✔️جواب / شكرا على ملاحظتك بس أنا مااشتكيتش ليك 

،❌سؤال /اللبس بتاعك مش لايق على بعضه كده ليه ؟

✔️جواب / أذواق وانا عاجبنى اختيارى 

❌سؤال /معاك رصيد كام فى البنك ؟

✔️جواب /مستورة الحمد لله .

❌سؤال / ايوه معاك فلوس كام يعنى ؟

✔️جواب / تعالى معايا البنك ونشوفهم سوا .

✔️جواب آخر / انت مالك (إجابة للمتطفلين فقط )

✔️جواب آخر /دى خصوصية ماينفعش اجاوبك 

❌سؤال / انتى فرحك امتى ؟ 

✔️جواب / قريب إن شاء الله كل شئ بأوان 

✔️جواب آخر / ماتقلقيش لمانحدد الميعاد هبقى أعزمك 

❌سؤال / انت ذووقك وحش فى الأكل حد ياكل …..كذا 

✔️جواب / المثل بيقول كل اللى يعجبك وإلبس اللى يعجب الناس فأنا باكل اللى يعجبنى 

،✔️جواب آخر /الحمد لله نعمة ربنا 

✔️جواب آخر / خلاص اعزمنى على الأكل اللى انت شايفة أحلى 

❌سؤال / جوزك شكله وحش ماهو فعلا المخدة ماتشيلش اتنين حلويين ؟

✔️جواب /أنا بحبه ودى خلقة ربنا والحلاوة حلاوة الروح 

❌سؤال / ايه ده انتى تخنطى أووووى ؟

✔️جواب / أصل مش باكل فى نفسي .

✔️جواب آخر / عاجبنى نفسي 

❌سؤال / انتى اتجوزتى من شهر ولسه ربنا ماأكرمكيش بالحمل ؟

✔️جواب / اللى ربنا عايزه يكون ومش معنى أن مفيش حمل أن ربنا ماأكرمنيش ،أشكر الله على كرمه 

✔️جواب آخر / كفاية عليا جوزى مالى عليا حياتى ومهنينى 

،❌سؤال / انت مش بتتصل بيا ليه تسأل عليا؟

✔️جواب / وانت ماشاء الله مقطع الدنيا اتصال .

✔️جواب آخر / وانت مابتتصلش ليه ابقى رن عليا هكنسل واتصل بيك 

فى انتظاركم تكتبولنا أمثلة للأسئلة المحرجة ونرد عليكم بالإجابات الدبلوماسية علشان تحافظوا على مناعتكم النفسية وتاخدوا حقكم ممن اعتادوا ايذاءكم 

دكتور مينا عزت 

استشارى ودكتوراه العلاج النفسي 

ورئيس مؤسسة الدكتور مينا عزت للرعاية النفسية والصحية 

ومدرب دولى معتمد بالوكالة الدولية الأمريكية