نفسي اشوفِك مرة صدفة فتثبتيلي
إن الكون جه وجمعنا
و إن هناك خَلْف الحياة ؛كان في معنَى
كان في كنز مَخفِي ليا
طول نهاري وف عز ليلي
كانت ملكْتي هناك بتاجها
من قبل العمر والولادة
قبل الفهم قبل العبادة
والسيادة
من قبل مالدنيا تدوس زيادة
كنا هناك بنواجهها
كنت طفل في الحضانة .. وكنتِ أنتِ
كنت باكُل كُم السويتر .. وكنتِ أنتِ
لما عرفت إن الجبنة دي تبقي شيدر .. كنتِ أنتِ
في ابتدائي هناك شايفانا
لما قابلت للمرة الأولى حبيبتي
في الاعدادية والمراهقة وبدء الوَلَع
الثانوية وبدء الوجع .. وبرده انتِ
كنتِ في حياتك هناك زي ما أنتِ
كنتِ امي وكنتِ بنتي
أنا للأسف مش هقبل حكايتنا تكون عادية
هستني السما بجلالها .. تنزل تشاور وتقولي هي
هستني النجوم تأكد إن عيونك بصالها زيي
وتقولي الكواكب إن حلمك نفس حلمي
والشواطئ والمزارع والجبال
تقولي دي رمز الجمال ؛اللي انتظرته
دي حبيبة القلب قبل الوجود قبل خليقته
قبل شبابي وقبل حيرتي
قبل التحدي
قبل الحياة قبل الوجع
قبل حتي اسم الدلع
كانت هناك في عالم اتوجد لَيكون بتاعنا
لعمر جديد مليان سنين حلوة تساعنا
كانت روحينا حول بعض هيمانين
لذلك لما شوفتها حسيت بالحنين
كنت حبيبها المُنتظَر وكانت هي كل السنين ..
