يا حامل هموم وعم تعاني
رح خبّرك تاريخ إنساني
لبنان قلعة من صخر صوان
بيجوز قبل الدهر خلقاني
وأول ما الله كوّن الإنسان
لبنان قبلو كان متفاني
وصار الحلم يكبر مع الأزمان
وصوت الصدى ببلاد عمراني
يوصل مع الرسام وين ما كان
ويتحدث القاصي عن الداني
الرسام عِنّا للمجد عنوان
وراية شموخ بعزمها الباني
الرسام صرخة حق عالطغيان
وعينين عا هالأرض سهراني
الرسام غيم بينعش الوجدان
وغيث الهنا من وحي رباني
صمود الجبل بيخبّر الوديان
بينقل خبر من ميل للثاني
الرسام ثورة خلفها فنان
بيعرف شو بدو شعب بيعاني
عمرو كرامة وتضحية وإيمان
رْسالة شرف أطفال جوعاني
الرسام بحر مغيّر العدان
وطوفة حروف بأرض عطشاني
متل السفينة معاند الطوفان
بيحمي بظلّو حروف غرقاني
شمخة جبينو عز بالميدان
وشمعة عا طول العمر شعلاني
الرسام شجرة ورافة الأغصان
حساسينها ألحان وغناني
ونحلة بتجي وبتروح عالقفران
بتترك خوابي الشهد ملياني
وشردة خيال بقدرة الرحمن
الله خلقها من ضلع لبنان
تا صار كل الكون لبناني
