أوقات و كتير
دايما نغلط
و إحنا بنختار.
و بنلغي العقل
ما بنفكرش.
في اللي إحنا يا قلبي
( آمنا له)
و ما بنصدقش.
فرحتنا الزايدة عن المألوف
من كُتر جراحنا ف أيامنا
يمكن م الخوف.
العمر يعدي و يسرقنا
و لا فيه بنشوف
ناس تشبهه روحنا
و تعشقنا .
زي إحنا يا قلبي ما نهواهم
و لا هواهم.
كان ذنب علينا
في سكتنا أو كعبة هجر
و حواليها.
قاعدين بنطوف
و قيود و ظروف
و حنين بيرجع ليالينا.
لشروق و غروب
تايهه بينا
و نقول هنتوب.
و لا مرة نسلم أحلامنا
لقلوب قسوتها بتقتلنا.
نبعد عن شوقنا.
و بشوقنا
و لا عاد فيه حاجة
تشوقنا.
و لا ليها نتشد
و أهو ياما كلام
و بيترجم
من نظرة عين.
و في لمسة يد.
نوصل أحبالنا المقطوعة.
و الفرحة علينا و ممنوعة .
و كأن ما بينا و ما بينها
شيئ يشبه تار.
بنقدم روحنا علي كفوفنا.
يكوينا بنار.
نكتب له غناوي و تعويذة.
و بنعمل زار.
و أتاري البخت اللي صاحبنا.
تعلب مكار
و مالهش حبيب.
دايما بيسيب لنا كام ذكري
و بيمنع خطوتنا تعدي.
من ماضي و حاضر .
علي بكرا
و بتعمل خير مع كل الناس
و راميه البحر.
ف بيقلب سِحر
و تلاقي الخير يتردلك.
بقساوة و شر
و البحر بيضحك علي حالك
و يطلع ليك حتي لسانه.
و يقولك يا عبيط.
في الطيبة
إشرب وحدك من طعم المُر
الطيبة يا صاحبي
ساعات بتضر.
ما تحبش تاني في أيامك
و لا تندم عاللي بيجرالك.
و إتعلم إنك يا معلم
تاني متغلطشِ.
الشاعر /محمد النمر
