سمسمية وحمصية
والراجل بينادي وهو بيمر
وجوز الهند الأبيض
ولوز وبندق وحلاوة شعر
وفولية وملبن مسكر
وعسلية أشكال وألوان في عربية كار
كان طعم السكر في حلقي
سنين دلوقتي بقى طعمه مر
وعروسة المولد بيضا وحمرا
وحصان حلاوة وسيفه حُر
وزينات في كل حتة
مولد دة ولا في السما بدر
يا طيبة القلب فينك
وفين صحابنا وحبايب العمر
ياريت العمر يرجع
ولا نعرف تاني عنهم شر
كل سنة وانتم حبايب
كل سنة السنين بتمر
وياترى العمر اللي جاي
فيه حلاوة ولا كنافة محشية غدر
عهد وعلى نفسي واخده
لا يعرف قلبي لغالي كسر
ولا يقسى في يوم
ولا غير المحبة يعرف مهما فات العمر
مدحت ثروت
