حب ربنا مش محتاج واسطة أحد ..

بنت الجنرال / عزيزة الصادي – تكتب من : مصر القاهرة

موضوع مشايخ الطرق ده مش فاهماه بصراحة من زمان ..

من ٨ سنين تقريباً كنت بتكلم مع من الاصدقاء ومقلكوش بقي حاصل علي درجتين دكتوراه ومنصبه محترم جدا ده غير التزامه الديني والأخلاقي وسمعته الطيبة ..

وكان دائما بيلفت انتباهي خاتم غريب لابسه في أيده .. فسألته عن الخاتم فقاللي ده هدية من شيخي اللي واخد عليا عهد ..

أنا بصراحة مفهمتش يعني ايه واخد عليه عهد ؟

وقعد بقي يشرح لي أن كل واحد لازم يبقي له شيخ وطريقة وميعملش حاجة في حياته إلا لما يسأل الشيخ ولو الشيخ وافق وبارك يبقي تمام إنما غير كده لا !

يعني من الاخر الشيخ ده هو الواسطة بينك وبين ربنا ولو مشيت علي طريقته ونهجه هتدخل الجنة !

الأمر كله جنون وجهل وغير مقنع بالمرة بالنسبة لي يعني ايه ربنا يبقي فاتح لي بابه علي مصراعيه وبيعطيني كل الفرص و انا اروح ادور علي واسطة ..

ربنا مش محتاج واسطة نهائي ولا شيخ ولا طريقة منك لربنا علطول الأمر سهل وبسيط واي حاجة غير كده كفر وجهل وغباء.

دي وجهة نظري بصراحة .. وانا مؤمنه تماما أن ربنا مش محتاج مننا واسطة حد وبيسمعنا في كل حالاتنا وبيرزقنا ويسترها علينا من غير واسطة وقال لنا ادعوني استجب لكم ..

يعني اطلب من ربنا فقط وارفع ايدك بالدعاء لله فقط من غير واسطة ..

ربنا جميل و رحيم حتي لو كنت عاصي ومهما عملت وقت ما هتروح له وانت مليان خطايا ومكسوف من نفسك ربنا هيطبطب عليك وهيسامحك ويحن عليك مش هيلوم عليك ويهينك زي البشر ومش هيعايرك بالعكس ده هيفرجها عليك ويجازيك بخير كتير قوي علشان تحس اد ايه بحلاوة قربك منه وإن بعدك عنه اسوأ شئ ممكن يحصل لك ..

حبوا ربنا بجد وقربوا منه ربنا مش محتاج مننا واسطة ربنا عايزنا نرجع له بجد وبصدق.

.                        

اللهم ردنا اليك ردا جميلا