يعني ايه اكتب عليكِ
وانتِ روحك شعر خام
رمز معناه السلام
أخري بس اكدب عليكِ
م الحضانة والابتدائي
ف اللي ناقص واللي باقي
وانتي راضية
وصابرة ترضي
ترضي فيا عشان ضناكِ
وأما حد بيشتكيلك
من شقاوتي
من غباوتي
من كلامي
ومن سكاتي
يبقي ردك
ابني نور عيني وحياتي
أيوة طايش بس طيب
أبني مفيهوش شئ يعيب
بس واخد طبع جده
راسه أنشف م الرخام
ويقولولي اكتب عليكِ
دا انتِ روحك شعر خام
أمي يعني عملت عملة
وأما خوفت جريت عليها
أمي حب الكون دا جملة
يوم نجاحي يبان عليها
أمي أرضي وأمي داري
أمي دايمأ عرض ساري
بالمحبة وبالسماح
أى أدمان يبقي كارثة
إلا أدمانك مباح
أمي وقت الفرحة زينة
وردة بتزين جنينة
بس وقت الشدة ثابتة
صالبة طولها متنحنيش
نعمة ديمها يارب ليا
خد عافيتي وخد حياتي
وإدي أمي عشان تعيش
أمي معني وأمي لون
أمي ريحة فى الهدوم
أمي مهما تبان سعيدة
خزنة مقفولة بهموم
أمي وقفة وأمي عيد
أمي دى القلب الوحيد
اللي بيساع وقت ضيق
دعوة تفتحلي الطريق
كل شئ يصبح تمام
ويقولولي اكتب عليكِ
وأنتي أصلا شعر خام
والله يا أما غصب عني
اني اتحرم من أغلى صوت
لكن فرض الحياة الموت
بفعل الوقت زاد سنك
ولسانك كان ميزان حساس
عمره ما ينطق العيبة
لسة يا اما باقيلي فيكي
كام قصيدة مقولتهاش
كام مصيبة داريتها عنك
بس لجل متزعليش
فاكرة لما دعيت لربي
خد عافيتي وخد حياتي
وإدي أمي عشان تعيش
بس وقت الموت مزاد
كل شيء يرخص قصاده
لو بخاطري أديكي عمري
بس اشوف عينك ف عيني
لجل اطول فى الوداع
تلمسي بخدك جبيني
ياللي طينك نفس طيني
كنت مكتوب فوق جبينك
قبل حتي ما تجيبيني
نفسي كنت أخدك فى حضني
قبل ما تقوم القيامة
حتي أقولك بالسلامة
ولا أقولك متخافيش
سايبة راجل من وراكِ
أيوة غيبتك كاسرة روحه
بس مسنود من دعاكِ
وإن كل حرف منك
درس جوايا اتحفظ
جوايا لسه كلام كتير
بس هعمل أيه ياأمي
أدي أمر الله نفذ
واما عيدك جيه بدونك
جوم قالولي اكتب عليكِ
بس هكتب ايه عليكِ
وانتِ أكبر م الكلام
