تحدثت الفنانة إيمان العاصى، عن بداياتها فى الوسط الفنى، موضحة أنها دخلت المجال ليس حبا فى التمثيل ولكن بهدف إزعاج خطيبها الذى كانت على خلاف معه فى ذلك الحين.
وقالت العاصى، خلال حوارها مع الإعلامية منى الشاذلى فى برنامج “معكم منى الشاذلى”، على قناة cbc، إن البعض يعتقد أنها بدأت كعارضة أزياء، لكن هذا لم يحدث، مضيفة: “وأنا فى الجامعة كان عندى صديقة بتشتغل موديل وكانت رايحة تعمل فوتوشوت، وأنا وقتها كنت متخانقة مع خطيبى ومكتئبة فقلت لها خدينى معاكى أنا عايزة اتصور”.
وأضافت: “روحت عملت الفوتوشوت ده وعارفه إن هو هيجننه، وعارفه إننا هنرجع كده كده، بس صاحبتى قالت لى المصور كلمنى وعاوز يحط صورتك على غلاف المجلة قلت لها حطيها عشان يتغاظ أكتر”.
وتابعت إيمان العاصى: “اللى نزل الصورة كتب تحتها إنى بحب التمثيل واشتغلت موديل، فخطيبى جاب المجلة وجالى واتخانقنا، المهم المخرج خالد بهجت شاف الصور وكلمنى بعدها وقالى عاوزينك فى مسلسل هتقومى بدور بنت الفنانة رغدة، فقلت حلو هو ده اللى هيجيب أجل خطيبى من الغيظ.. ودخلت أمثل عشان أضايقه، بس كملت للنهاية”.
