|
| الإعلامية دعاء فاروق |
علقت الإعلامية دعاء فاروق، على الانتقادات التي تتعرض لها بسبب الملابس التي ترتديها أو التصميمات التي تعرضها لبعض العارضات خلال برنامجها، مؤكدة أنها منذ بداية حجابها وهي ترتدي في كل مكان ما يناسبه.
وكتبت دعاء فاروق، منشورًا عبر حسابها الشخصي بموقع فيسبوك: تعودت منذ بداية حجابي على تغيير طريقة لبسي في كل مكان بشكل يناسب المكان، ارتدي في العمرة ورمضان والمساجد والصلوات عبايات، ارتدي في النادي مع الأولاد ترينينج سوت أو جامب سوت، وارتدي في البرنامج تايورات وكارديجان وجاكتات وبدل وفساتين، وأشكال مختلفة من الستايلات.
واستكملت دعاء فاروق: ارتدى في الأفراح فساتين سواريه، أو بدل سواريه، وارتدي على البحر بوركيني، وعليه كاش شيفون واسع، وساعات أحب ألبس فساتين واسعة على البحر، ارتدى في البيت بيجامات وحينما أفتح الباب للأغراب ألبس إسدال عليها، لا اخرج بالإسدال ولا ارتدي عبايات طول الوقت.
وتابعت دعاء فاروق: أجد راحة في ارتداء ما يناسبني ويناسب المكان ألبس اللي يريحني ويناسبني ولا أفرضه على أحد، ما الذي يدفع البعض للدخول فيا شمال طول الوقت بسبب لبسي، أنا عايشة عمري كله بلبس كده عادى، هو أنا عجبة، يعني اللي بقوله ده وتصنيفه الهدوم دى عجبه.
وواصلت دعاء فاروق: مش الناس بتلبس كده ولا أنا هبطت من كوكب المريخ بقرون وديل ولابسة افاتار عشان كل صورة انزلها خاصة بالشغل والعارضين اللي بعرض لهم تصميماتهم لازم اتقطم بكلمتين من بتوع بتتغيري وبتنزلي وبتطلعي وحجابك بيقل وشكلك ومنظرك، وفيه نقطة أسفل الذقن تندب فيها رصاصة، وفيه سن نملة الدبانة، وفيه صابع مطرطق من الصندل طول الصيف جايب لي الكافية اوديه فين طيب.. ادينا بنلمه بشراب في الشتا اللي هو شهرين بس عشر شهور حر مبعرفش البس شرابات في الصيف، بتضرب صهد في النافوخ عدل، اخبيك فين يا صابعي، سيبوا صابع رجلي في حاله، صلوا على النبي يا جماعة واستغفروا الاستغفار بيجلب الرزق والله.
واختتمت دعاء فاروق حديثها قائلة: جربوه كده كل ما اضايقك بسن نملة الدبانة أو صابع رجلي أو طرطوفة ودني، استغفري علي طول والله ابرك من مليون تعليق، ربنا هيرزقك والله من وسع وهيفتحها عليكي، استغفروا ربكم إنه كان غفارًا، استغفر الله العظيم من كل ذنب عظيم، ربنا يرزقنا ويرزقكم من وسع يا رب.
