على قد عقلها ….
إضحك علي دنيتك يا صاحبي وإضحكلها
تعند معاك وتصد غني وطبلها
ون طبلت هية سايسها وأرقصلها
خدها كده زيي علي قد عقلها
………..
كشري بالدقة …
قلبي إتعصر و إتدق في الثانية ميت دقه
كان نفسي يوم الفرحة ترقصلي ع الدقة
طلبت صحن كباب جه كشري بالدقة
سألت إيه السبب قالوا حظك إتنقى
……..
الفصلة ويا النقطة …
الفصلة ويا النقطة خليهم سكتك
سايس بالهداوة وعدي بفصلتك
فوت للي تحبه ولو زودها حبه
اهدم جسر المحبة و انزل بنقطتك
……..
زاد الوجع …
زاد الوجع عالجدع صرخ وقال حي
سمعوها أهل البلد وكل أهل الحي
لا حد جه واساه والكل رايح جي
عيني عليك يا جدع وجعت قلبي الحي
……
عنقود عنب …
عنقود عنب وإتفرط أنا قلت منه ألم
داسوا عليه الخلق والكل ولا مهتم
قلت أعصره وأتهني وبلاش نواح واتلم
أشرب أنا وأنبسط يلعن أبوك يا غم
