مساء الزهور مساء ايام زمان واحنا اطفال مكانش ف حاجه اسمها سهر حتى لو فى سهر اخرك فى السهر الساعه تسعه ممكن تنام على على حجر امك على حجر ستك
وياسلام لما تنام على رجل امك تحط يدها على راسك وتقعد تعسعس بصباعها فى شعرك سبحان الله تنام
اما لو طفل شقى يقولك نام احسن ابو رجل مسلوخه جايلك بمجرد ماتسمع كلمة ابو رجل مسلوخه اتوماتيك تغمض عينك وتدخل فى غيبوبه نوم
ولما يقول لك الكباره جات بتنعر بره
وتعريف الكباره هو صوت البومه كنا لما نسمع صوتها ممكن تتحمق وتبكى وتقد خايف وتترمى فى حضن امك وتنام
احنا كنا نسمع حكايه امنا الغوله وانت بتسمعها بتظهر على وشك تعبيرات الخوف
احنا جيل كنا بنسمع قصة الشاطر حسن نفرح ونتخيل نفسنا اااااه لو انا الشاطر حسن
احنا جيل اتربى من عظماء كانو عايشين بالفطره سيبينها على الله كان لما طفل يحصب يلبسوه بيجامه أو جلبيه حمراء وممنوع حد من الأطفال يخالط الطفل المحصب
ولو خضك كلب اول كلمه تسمعها من امك اسم الله عليك اسم النبى حارسك وصاينك وتضمك بحضنها وبعد كده تضربك على صدرك كام طربه خفيفه ومع كل ضربه تقول إطلعى ياخلعه الكلب من القلب
عادات
ولو فى طفل أتأخر فى أنه يمشى زى الاطفال إلى فى سنه ياخدوه يوم الجمعه ويكتفه رجله بشريط ويحط فى حجره كيس فيه فول سودانى وحمص وفيشار وبلح وحلاوه واول واحد يطلع من الجامع يفك الطفل وباخد الكيس
كان عادات
لو لوز الطفل وجعته وكان ستى تقولى تعاله أما امرسلك لوزك وتدفى شوية زيت وتعقد تمرس وروحك ممكن تطلع فى يدها كفايه خلاص ياستى حموت اهو خلاص خلصت استنى ياستى جدع حبيبى خلاص وفى الاخر تمسك منديل وتربط رقبتك بالمنديل ونشد المنديل لفوق على راسك لحد مالسانك يدلدل وتربط جامد وتقولك تعاله نام دلوقتى تخف
عادات
لو صدرك وجعك وقعدت تكح يدهونلك صدرك بشويه زيت اكل ويحطولك جرنال واول ماتصحى من النوم يجبولك شوية ميه سخنه تشربها على الريق
عادات لو اى حد تعب بالسخونه يجيبو شويه زيت على شوية خل ولمون ويدفوهم على النار ويدعكو بيه جسم المريض كله ويتغطى وينام يعرق يقوم زى الفل
والله كان ناقص شوية كمون ويبقى طبق فول
